ياشهيد نام واتهنى .. هما فى نار وانت فى جنة

ياشهيد نام واتهنى .. هما فى نار وانت فى جنة

السبت، 31 ديسمبر، 2011

مصر والاندروير وعلماء السلطان واشباه الرجال

من المضحكات المبكيات  ان كل الشعب المصرى يترك عرضه الذى يسحل ويكشف امام العالم فى فضيحة تلطخ سمعة الجيش المصرى ليتحدث عن الاندر وير بتاع الفتاة المسحولة , اكاد اجن هل فقد الشعب نخوته هل ماتت فينا الرجوله؟ هل نظام مبارك حول الشعب كله الى اشباه رجال ؟ هذة الفتاة حتى لو كانت عاهرة او كافرة وحاشه لله ان تكون ذلك فهى فى نظرى مثال للفتاة الشريفه الشجاعه التى تضحى بحياتها من اجل نصرت بلدها ودينها لا يجوز بحال من الاحوال ان يحدث لها هذا ولا يجوز ان يكون هذا رد فعل الشعب ابدا هذا ليس فى الاسلام الم يامر سيدنا ابوبكر الصديق جيوش الاسلام الا تقتل طفلا ولا امراة ولا رجل عجوز الم يقم سيدنا محمد بطرد اليهود من المدينة بعد كشف احدهم لعورة امراة مسلم لم يسأل احد وقتها لماذا لم تكن ترتدى شيئا اسفل عبايتها , الم يحشد المعتصم الجيوش من اجل صرخة امراة , هل نترك كل ما حدث لها لنتحدث فقط عن ماترتديه اسفل عبايتها ؟ ان كنتم جبناء وتفعلون ذلك لتغطوا على جبنكم وخنوعكم فلا تطلبون منا ان نكون مثلك اجلسوا انتم فى بيوتكم مثل النساء واتركونا نموت فى سبيل وطننا

اقولها لكل الشعب المصرى "من انتم"؟ هل انتم الشعب الذى ذكر فى القران والاحاديث النبوية صاحب النخوة والكرامة والرجوله ام انتم اشباه رجال مجرد مسوخ لشعب عظيم انقرض .

 
ما يحزن اكثر واكثر ان تجد نساء تخوض فى عرض البنت وتسمع لو كانت محترمة مانزلت من بيتها بالبلدى ايه اللى ودها هناك ؟ اقول لكم ان كانت هذة الفتاة من وجهة نظركم اخطائت وتستحق ماحدث لها ما ذنب هذة الفتاة التى كانت تسير مع اخوها و ترتدى ملابس  كثيرة وليست على اللحم كما ردد الكلاب عن ست البنات وسحلت سحلا , الا تخجلون هل ترضى واحدة منكم ان يفعلها ذلك  وهى تسير فى الشارع ؟ لماذا تساعدون الجلاد على ان يضربكم بالسياط لماذا ترضون الذل والعار؟ اين انتم من نساء ثورة 19 اين انتم من فدائيات 1956اين انتم من امهات الشهداء الصابرات المحتسبات؟ .





 كفاكم انبطاح ياشعب مصر  من لايرى الحق وهو ظاهر امام فقد اظلم الله قلبه وعقله ولا امل منه

ماذا تساوى فضيحتنا امام العام كله عندما نشرت هذه الصورة , ماذا يساوى عندما تخرج صحف اسرائيل للتحدث عن جيش مصر الذى يسحل بناته ويهتك عرض بلده اى عار بعد ذلك تنتظرون


من المضحكات المبكيات ان يخرج علينا شيوخ السلطان ليتحدث عن عرض الفتاة وينسى ان الخوض فى عرض المحصنات بدون بينه جزاؤه 80 جلدة فى الاسلام , كيف نمت ياشيخ خالد مستريح الضمير والبال وانت بعد ان خضت فى عرض امراة مسلمة محصنة , كيف نمت ياشيخ خالد وانت تأمن عقاب الله , اليست هذة اختك مثل كاميليا ووفاء ام انها من جنس اخر ؟ اتمنى ان تراجع نفسك وتتوب وتعتذر للفتاة بدلا من الكبر والتعالى ورفض الاعتراف بالخطأ .










من المضحكات المبكيات ان يتحث احمد شوبير ومدحت شلبى المخنثين اشباه  الرجال فى عرض الفتاة  وينسى الاول الفيديو الشهير له وهو يتحدث بكل بجاحه مع فتاة عن علاقاته الجنسية مع النساء وفيديو اخر عن تزويره للانتخابات والثانى المنافق الاعظم المخنث الذى يضع مكياج على وجهه الرقاص قائد فتنة مصر والجزائر صاحب النكته الجنسية على الهواء لحاس جزمة مبارك ونجليه ولحاس بيادة العسكر


هل نسيت ياشوبير فضيحتك مع صحفية الفجر لتخرج وتحدثنا عن الاخلاق وتخوض فى عرض فتاة اشرف من مليار من امثالك


هل نسيت ياشلبى يا ارجوز انك دائما عبد وارجوز للحكام وتخرج لتحدثنا عن الحرية وتطعن فى عرض ست البنات


هل نسيت ياشلبى فضائحك الجنسية على الهواء لتحدثنا انت عن الاخلاق


هكذا يكون الرد على مدحت شلبى المخنث من احد شباب الثورة



المفجع فى الامر ان كثير من الناس يتخذون من توفيق عكاشة مثال يحتذى به فى المذيع الوطنى  ويستشهدون بكلامه وجعلوا منه بطلا قوميا يرفع على الاعناق انا ممكن اتفهم ان يحدث ذلك مع البسطاء اما ان يحدث هذا من اناس المفروض انهم مثقفين او من بعض طلاب الجامعة وخريجى جامعات فهذة قمة الفاجعة التى نعيشها اكاد اصاب بالشلل عندما اذهب الى قريتى ويتحدث اخى وهو خريج كلية حقوق عن توفيق عكاشة بانبهار وكانه مصطفى كامل فى زمانه , نحن فى زمن الفتن الذى يصدق فيها الكاذب ويكذب الصادق ويؤتمن الخائن ويخون الامين , هل نسى الجميع انه عضو بارز فى الحزب الوطنى زورت له الانتخابات ؟ هل نسى الجميع كلامه عن مبارك اثناء الحكم وكيف انقلب بعد نجاح الثورة؟ هل نسى الناس  الفيديوهات التى يقبل فيها يد  صفوت الشريف وخرج بعد الثورة لينفيها وكاننا مواشى بلا عقول مفترض منا ان نصدقه .


توفيق عكاشة :انا اقدس مبارك


توفيق عكاشة :انا فل من الفلول حد عايز حاجة

الا يرى الناس كيف يظهر امام الكاميرا ويقوم بحركات وافعال لا تخرج الا من شخص مجنون ؟ هل نظام التعليم فى مصر طوال السنوات الماضية هو المسئول عن الحالة المزرية التى وصل لها خريجى الجامعات الان الذين يعانون من خواء ثقافى وتعليمى واخلافى , ام اننا شعب سهل الانقياد سهل الضحك علية بكلمتين ؟.

الا يرى صاحب عقل ان المجلس العسكرى يحارب الثورة بكل قوته يشوه كل من قام بها بخطة ممنهجة بدء بشباب 6 ابريل الذين كانوا يسحلون فى الشوارع وبهوات المجلس العسكرى يجلسون فى التكيفات وينحنون لمبارك , بعدها الاشتراكيين الثوريين ثم خطف النشطاء وهتك عرض الفتيات واذلالهم ,يركع لامريكا واسرائيل كما كان يفعل مبارك يصدر الازمات السياسية والاقتصادية حتى يكره الناس الثورة , يرتكب المجزرة تلو المجزرة يقتل المسيحى والمسلم الطفل والعجوز ويدبح فى شباب مصر الحر فاى ثورة هو حماها .

اقولها للجميع وللمجلس العسكرى والله لو قتلتونا فردا فردا وشابا شابا لن تستطيعوا ان  ترجعونا عن حلمنا باستكمال ثورتنا وتحرير وطننا من اجل حلمى الاكبر بالزحف الى الاقصى واما الشهادة او الصلاة على بابه  بعد ان يعود للاسلام والمسلمين .





الأربعاء، 12 أكتوبر، 2011

نفسى ابقى لظخ واصدق ان مجلس الخونه حمى الثورة علشان ارتاح




مش عارف ابدء منين انا مخنوق بجد ومش عارف ليه اللى احنا فيه بيحصل نعمل ايه اكتر من كدة ثورة وعملنا ثورة ومفيش فايدة اللى بيعقد على الكرسى بيلزق فية مجلس عسكرى قذر بمعنى الكلمة وانا مش خايف واللى يحصل يحصل هما 19 كلب ربنا ابتلانا بيهم ومش عرف هنخلص منهم ازاى لا مليونات نافعة ولا اضربات نافعه ولا انتخابات هتنفع اللى بيقول ان الانتخابات هتنى حكم العسكر بيحلم دول خلاص داقوا طعم السلطة وقعدوا على الكرسى وصعب يسبوه اللى بدم كانه مكتوب علينا نخلص من كلب يطلع لينا 19  هو احنا مش مكتوب لينا انتصار كامل ثورة عرابى تنتهى باحتلال بريطانى ثورة 19 لا تكتمل ثورة 52 او  انقلاب بمعنى اصح يلبسنا فى حكم عسكر 60 سنة حرب اكتوبر السادات الله يسمحه يسلمنا تسليم اهالى لامريكا واسرائيل ونعيش مذلولين وعنينا مكسورة 40 سنة واكتر ثورة يناير شكلها هتلبسنا فى عسكر او كلب من كلابهم زى عمرو موسى ولا نجى فى الاخر ونلاقى المشير ولا عنان نازل الانتخابات ونخلص .

 نفسى ابقى لطخ والله بجد علشان اريح دماغى واصدق ان المجلس الزفت ده حمى الثورة والله ما اعرف ازى الناس اللى بتهلل للمجلس دى مقتنعة ازاى ,سيبنا من المطبلتية والمنتفعين زى مصطفى بكرى بس المواطن العادى اللى شايف اللى بيحصل كل يوم ولسه مقتنع ان المجلس انحاز للثورة  وبصراحة قرفان من بلال فضل كنت بحبة بس موقفه غريب ومش مفهوم لا اشكك فى وطنيته ولكن مستغرب موقف ودفاعه عن العسكر حتى الان

نفسى ابقى غبى علشان ارتاح من حرقه الدم ليل ونهار واكون مع المطبلتيه بس ربنا مدينى مخ وعين بتشوف وحب لبلدى وخوف على مستقبلها مش مخلينى اعرف ابقى لطخ بابخت كل لظخ مريح دماغه ومقتنع ان المجلس حمى الثورة .

جه علي يوم وقلت اصدق ان الجيش حمى الثورة اسمع المشير بيشهد زور وهو فى اخر ايامه ويقول ان مبارك لم يعطى اوامر بقتل المتظاهرين امال انت حميت  الثورة من ايه  من الشعب مثلا ولا من الثوار يارب تنفضح على رؤوس الاشهاد يوم القيامه انت وديلك سامى عنان , وشفت شباب بيتقتل فى العباسية على ايد الروينى الله يجحمه و حمدى بضين يقود موقعة ماسبيرو ويقتل شباب مصرى بدم بارد تحت عجلات المدرعات وكانهم يهود  واسماعيل عتمان الكاذب الاكبر المضل المضلل عديم الدين وموقعه السفارة 1و2 وو9 مارس و8ابريل وضرب اهل الشهداء وفض الاعتصامات بالقوة واعتقال المدونيين والنشطاء واستخدام سلاح البلطجية  وكشف على عذرية بنات اشرف من كلاب المجلس مليون مره  تعيين وزير اعلام انس الفقى جنبه ملاك يشعل فتنة طائفية فى البلد كانت ستتحول لحرب اهلية لولا ستر الله



نفسى اعرف المجلس دة لايتعظ من مصير مبارك ليه بيكرر كل الغباء الذى كان يرتكبة خطوة بخطوة  لية مصر على عدم تطيهر البلاد ليه مصر على رفض دخول التاريخ من اوسع الابواب ويصر على ان يبقى دلدول لامريكا واسرائيل ويقولك حركة 6 ابريل خاينة الخاين ياحضرات من يطير لامريكا ذهبا وايابا لتلقى التعليمات ويصور وهو يشرب الخمر معهم الخائن من يعمل بكل جهدة لافشال الثورة ويعبث بمستقبل بلادة من اجل عيون امريكا وليس الذى يسحل فى الشوارع من 2008 من اجل حبه لبلادة , الخائن ياحضرات من يرفض القضاء على الفساد ويصر بشكل غريب على حماية فلول الحزب الوطنى الذى هددوا بشكل صريح بحرق البلاد ويتركون بدون حساب  وفى الوقت نفسة يقتل فى الاقباط الذين يطالبون بحقوقه فقط .

يشهد الله انى مسلم وموحد ولكن متعاطف ومتضامن الشباب المصرى الشريف الذى قتل تحت عجلات المجلس اى كانت ديانتهم هما شباب خرجوا لمصلحة بلدهم لا يرغبون فى سلطة او جاه او كرسى سيزول وسيتحول لنقمة يوم القيامة على من جلس علي ولم يراعى حقوق البلاد والعباد ولم يتقى الله فى شعبه .



رحت  المستشفى القبطى عقب مجزرة ماسبيرو وشهدت الجثث مرمية شمال ويمين الدم فى كل حتى شباب مهروس وشباب مضروب النار حاجه تخلى الحجر ينطق ويقول كفايا بقى احنا عملنا ثورة علشان الكل يعيش بحرية مش علشان كل يوم نودع شهداء



يارب اللهم عليك بالمجلس العسكرى واجعل تدبيرهم تدميرهم واخرج مصر والمصريين من قبضتهم سالمين , يارب ساعدنا نكمل ثورتنا وانصرنا على اعدائنا , يارب انت اعلم اننا نحن بلدنا ونحب ديننا ونفعل ما نفعل من اجل مستقبل بلدنا وخير امتنا العربية الاسلامية فوفقنا لكل خير وايدنا بنصرك يارب العالمين ,




كل اللى يدخل هنا يدعى قبل مايمشى ان ربنا يخلصنا من العسكر ويحمى بلدنا من الفتن



الخميس، 28 يوليو، 2011

بيان: جمعة الارادة الشعبية ووحدة الصف





تؤكد القوى الوطنية المجتمعة، في هذا الظرف التاريخي الحَرِج الذي تمر به البلاد، على أن الجمعة القادمة (٢٩ يوليو) هي جمعة الإرادة الشعبية ووحدة الصف الوطني، الهادفة إلى إنهاء حالة الصراع والانقسام بين القوى السياسية المختلفة ورفض التشرذم حول مصالح سياسية أو حزبية ضيقة.

وتؤكد على استمرار التوافق والإجماع الوطني، الذي كان سببا رئيسيا في إنجاح الثورة، مع التأكيد على أن هذه الجمعة لن تشهد تنازعا بين أي من القوى السياسية المشاركة، والتي توافقت على المطالب التالية:




1-
وقف المحاكمات العسكرية للمدنيين، أما من تمت إدانتهم فإعادة محاكمتهم
أمام المحاكم المدنية المختصة



2-
الإسراع في محاكمة قتلة الثوار، وإنهاء كل محاولات إهدار حق أسر الشهداء
في القصاص العادل والتعويض الملائم والتكريم اللائق بشهداء مصر


3-
تفريغ دوائر قضائية لضمان المحاكمة العاجلة والعادلة لرموز النظام
السابق


4-
إنجاز كافة الإجراءات التي تحقق رفع مستوى المعيشة للمواطنين وتحقيق
العدالة الاجتماعية عن طريق وضع حد أدنى وأقصى للأجور


5-
الإسراع في تفعيل قانون الغدر لمنع كل من أفسد الحياة السياسية من
المشاركة في صياغة مستقبل مصر

وإننا، إذ نؤكد على مشروعية وعدالة كل هذه الأهداف، فإننا نعول في تحقيقها على
الإرادة الحرة للمصريين، وعلى نضالهم السلمي، البطولي، في ربوع مصر المختلفة،
ونؤكد على أهمية قيام مؤسسات الدولة بدورها في حماية حقهم في التظاهر السلمي.






*
الموقعوون:*


-
إئتلاف شباب الثورة


-
حزب الحرية والعدالة


-
الجماعة الإسلامية


-
حزب التحالف الشعبى الإشتراكى


-
حزب العمال الديموقراطى


-
الحزب المصرى الديموقراطى الإجتماعى


-
الإشتراكيين الثوريين


-
حزب مصر الحرية


-
الجبهة القومية للعدالة و الديموقراطية


-
حركة المصرى الحر


-
اللجان الشعبية للدفاع عن الثوره


-
حركة مشاركة .


-
حركة بداية .


-
حزب الوعي .


-
حزب التيار المصري .


-
رابطة الشباب التقدمي


-
ائتلاف شباب اللوتس


-
اللجنه التنسيقيه لتحالف حركات توعية مصر .


-
شباب من أجل العدالة والحرية

الثلاثاء، 5 يوليو، 2011

8 يوليو حياه او موت ومعتقلات ياشعب مصر فايهما تختار .. يسقط يسقط حكم العسكر



ملعون ابو الشرطة على  المجلس العسكرى على  عصام شرف على ملعون ابو القضاء الفاسد كدة كتير انتوا عايزين ايه بالظبط الثورة دى هتكمل غصب عن اى حد دى ثورتنا احنا هنكملها بدمنا ولن تفشل الا عندما نكون جثث تمشى عليها سيارات كلاب الشرطه .

يعنى ايه بقى الظباط يخدوا افراج وانس الفقى والمغربى براة واخلاء سبيل اسامة الشيخ والحكم على رشيد بالحبس خمس سنين مهو هرب بقى والحكم مش هيتنفذ الشعب فى الاخر هو اللى حرامى ياولاد الكلب .

ولعوها ولعوها انتوا بتخدمونا اوى ليوم الجمعه , انتوا اكيد مش حاسين اننا عملنا ثورة مات فيها شهداء ومصابين  ولا ايه نظمكوا بالظبط احنا خلاص قرفنا  والرد هيكون يوم 8 يوليو ويامجلس ابناء مبارك  هنوريكم الغضب هنعلمكوا الادب


طول عمر اهل السويس رجاله واهل مقاومة وزى مااشعلوا ثوره 25 يناير وسقط مهم اول شهيد اشعلوا الامور قبل جمعه الحسم 8 يوليو  "يابيوت السويس بابيوت مدينتى استشهد تحتك وتعيشى انتى "


هتافات السوايسة المعتصمين " يامشير يامشير انت طلعت كلب كبير "   "سامحيني يا ام الشهيد..ماجبتلوش حقه..ابنك-عريسنا-اندفن ورصاصته في حلقه..والرب عارف وشايف ما جري لخلقه" "سلامات سلامات .. الجيش والشرطة اخوات " "اللي لسه بيحمي مبارك عمره مايحمي داري ودارك" "عضم ولادنا نلمه نلمه.. نسنه نسنه.. ونعمل منه مدافع وندافع.. ونجيب النصر هدية لمصر" "يا طنطاوى قالك ايه ..! قبل مايمشى سعاده البيه !!؟ قاللك احبس ف الثوار ... خلى العيشه دماار ف دمار ..! قالك ارفع ف الاسعار !!
ياشعب مصر العظيم انتوا عايزين ايه بالظبط نسكت على كدة والنظام بيرجع يكون نفسة ونرجع مبارك ونخلص بقى من حرقة الدم دى .. ياننزل ملايين يوم الجمعه ونرجع الثورة لمسارها الصحيح .

من الاخر كدة الجمعه اللى جايه حاسمة ياما الثورة دى ترجع وتكمل طريقها صح يكل واحد يجهز شنطته ياما نسافر بره ونسيب البلد دى للحرامية يانجهز الشنط وامواس الحلاقة علشان المعتقل والله الموفق.