ياشهيد نام واتهنى .. هما فى نار وانت فى جنة

ياشهيد نام واتهنى .. هما فى نار وانت فى جنة

الاثنين، 14 ديسمبر، 2009

14 ديسمبريوم مولدى انا بقى عندى 24 سنة ازاى مش عارف


فى مثل هذا اليوم 14 ديسمبر عام 1985 جئت الى الدنيا فى يوم سبت على يد دايه وليس دكتور اسمها "مجبدة " فى بيت فلاحى قديم يضم كل العائلة كان عايش فية ابويا واخواتى

واعمامى الثلاثة وولادهم وستى ربنا يخليها كل واحد فى اوضة البيت دة اتحول دلوقتى لاربع بيوت واسعة بيتين ثلاث ادوار وبيتين دور واحد .

البيت القديم كان واسع وتحس فيه بالدفا ولمة العيلة كان وراه عنبة كبيررررررررررررررررة وستى كان حراسه طول النهار مننا علشان كنا بناكل العنب قبل مايطيب وقدامة توته كبيرة كانت بتجيب توت ابيض طعمة احلى من العسل كنت بطلعها زمان .


انا مش مصدق انى عايش بقالى 24 سنة عدوا ازاى معرفش .انا فاكر طفولتى وحاسس انها لسة امبارح نفسى ارجع طفل زى زمان موريش غير اللعب وبس مفيش شغل مفيش سفر كل يوم مفيش تفكير فى بكرة عايش اليوم بيومة وبس .

زمان وانا صغير كنت بحلم ابقى كبير "كنت غبى " الانسان مبيحش قد ايه الطفولة دى نعمة الا مايكبر ويشيل الهم طول مالواحد تحت العشريين مش بيبقى شايل هم حاجة بعد العشرين يدخل الفرض مطحنة الحياة والدوامة تفضل شغالة لحد ما نموت .

انا عمرى ماحتفلت بعيد ميلادى وساعات كتير كان بيعدى ومش بفتكرة او اعرف ان النهاردة 14 ديسمبر بالصدفة السنة عموما فى الارياف مفيش حد بيحتفل بعيد ميلادة . بس انا قلت احتفل بيه السنة دى من نفسى ويكون معاكوا علشان السنة الجاية ممكن اكون برة مصر يلا نطفى الشمع وناكل التورتة وكل واحد وواحدة يدخلو يسيبوا الهدية متنسوش انى منوفى ومش بعزم حد بالساهل كدة


الخميس، 26 نوفمبر، 2009

العيد فرحة مااااااء كل سنة وانتوا طيبين







يارب اكون هناك قريب

وتنولها لكل الى بيتمناها


هع بس نكلك الاول وبعدين الاهل والاصحاب مش هيطيروا







يعنى تنتحر وتموت كافر



ادعى زى ماتدعى الدبح عليك هو المكتوب ياولدى


لا ناصح بس هتتاكل يعنى هتتاكل



كل سنة وكلكم بالف خير ويارب السنة الجاية كل واحد يكون حقق احلامة ويكون المعتصم اجوز وعزمنا وميطلعش منوفى وتكون شيما شدة حيلها زى ما كل قريبها بيقولوها والدكتورة ستيتة تكون على جبل عرفات هى والدكتور حسبو وتدعيلنا هناك


الخميس، 19 نوفمبر، 2009

شكرا منتخبا وبالجزمة يابربر


فى البداية وحشتووووووووونى موت والله الغياب كان غضب عنى بس انا متابع كل كلمة بتكتبوها وكان نفسى اجى الاجتماع بتاع المنصورة بس متعوضة وبحب اشكر كل الى سال عنى وخصوصا اختى العزيزة شيما صاحبة مدونة "الشعب لابد من حكومة تشكمة " ومروة صاحبة مدونة "ملقتلهاش عنوان.


نجى بقى لموضوعنا اولا انا قلت بعد هزيمة الجزائر بتاعت 3/1 اننا نقدر نوصل كاس العالم لو فازنا بالمتشات الباقى ودة حصل ولو فيه عدل نوصل بفارق الاهداف يعنى اللاعبية عملوا الى عليهم وبقولهم الف الف الف شكر كان نفسنا تكونوا فى المونديال لانكم تستحقوا وكنتوا هتشرفوا العرب بس مش مشكلة قدر الله وماشاء فعل . جيل ابوتريكة والصقر والحضرى انتم افضل جيل فى تاريخ الكرة المصرية وشحاته افضل من درب المنتخب .

ثانيا يغور كاس العالم قصاد نقطة دم اى مصرى صحيح انا زعلان ودمى محروق بس بعد الى شوفناه فى السودان كان ممكن يحصل مجزرة للمصريين اذا المنتخب فاز ؟

ثانيا انا ابتديت اتخلص من حاجة مسيطرة علية وكنت بحلم باليوم الى يتحقق وهى القومية العربية من الواضح ان دة مستحيل يحصل وعرفت دلوقتى بس معنى كلمة السادات "العرب جرب "صح ومليون صح عملنا كتير علشانهم وفى الاخر مش بنلاقى غير الاهانة والضرب والتعدى بدون سبب وكل شوية نقول احنا الكبار احنا الاخت الكبرى من النهاردة بلا كبرة بلا صغرة بلا قرف,من النهاردة الى هيحترمنا هنحترمة الى هيغلط ياخد بالجزمة مهما كان هو مين كفايا بقى زل ومهانة وصبر على ناس ولاد كلب ميستهلوش غير الضرب بالجزم .


انضربنا فى 56 عشان الشعب البربرى وفى الاخر يعملوا فينا كدة نفسى واحد منهم يطلع يقولى سبب واحد لكرهم الشديد ده لمصر و الى حصل فى الخرطوم "واضح جدا ان الموضوع مترتب له من زمان الحكومة الجزائرية اسف فرنسا فرع الجزائر جابت مجموعة من البلطجية من منطقة اسمها الاحراش وسفرتهم للسودان علشان يعتدوا على الجماهير المصرية وبعتوا معاهم قوات من الجيش الجزائرى واحتلوا الخرطوم بمعنى الكلمة قبل الماتش بيومين واشتروا مجموعة من السودانيين وبدوا فى رسم خطة الهجوم اكننا فى معركة سيوف وسنج وصوارخ وبلطجة مش ماتش كرة الى يكسف بجد انا حكومتنا الموقرة كانت عارفه كل دة ومعملتش اى حاجة واعتمد على الامن فى السودان الى اتضح انهم متواطئين مع الجانب الجزائرى بشدة ونروح احنا فى الاخر ضحية لكل دول .


الحكومة الجزائرية متواطاة بشدة والسفير بتاعهم حيوان ومنافق ومش مقدر خطورة الى بيقوم بية يضحك علينا هنا بكلمتين ويروح هناك يسخنهم ولا وزير الرياضة تحسة مشجع متعصب اهبل فى كلامة مش وزير فى حكومة . لا وطالع علينا النهاردة ويقول دعونا ننسا ما حدث مش هقولك غير كلمة واحدة واسف ياجماعة بس لاازم اقولها "احة" ننسى اية دانتوا علشان طوبة الله اعلم من الى رماها قلبتوا الدنيا علينا عيزنا ننسى ضرب اكتر من 10الاف مصرى معملوش اى حاجة غير انهم راحوا يشجعوا بلدهم .


ويطلع نطع منهم يامر بالغاء تصاريح العمل للمصريين فى الجزائر ويطلب ملايين علشان الضرائب طظ فييك وفى حكومتك وفى رئيسك وفى الشعب البربرى احنا نموت من الجوع فى بلدنا ولا حد يدوس علينا .

سحب السفير المصرى من الجزائر اقل حاجة وياريت الكلب بتاعهم يغور من عندنا بس سؤال هو السفير الاسرائلى مش المفروض يغور هو كمان مهم موتوا جنود كتير على الحدود ولا دول مش مصريين برضوة .


نجى لسى روراوة الراجل دة انا معجب بية رغم كل الى عملة لانه بيعمل لصالح بلدة ونجح فى دة تماما وضحك على الاهبل الى اسمة سمير زاهر ابوكرتونة الى مش شاطر غير فى لم الفلوس وتولع مصلحة بلده .


من دلوقتى لاازم اعلمنا يتوحد لحد ما ناخد حقنا ونسبنا بقى من هايفة شوبير ومرتضى وشلبى وصادق الكل يبقى واحد ونوجه رسالة توصل لكل العرب من اليوم الى هيجى نحيتنا هياخد بالجزمة على دماغة ودماغ الى جابوه . كفايا بقى لحد كدة احنا استحملنا كتير علشان خاطر الاخوة والعروبة والكلام الحمضان دة .



حاجة على جنب هما الفنانين دول راحيين يعملوا اية هو احنا فى مهرجان الخرطوم السينمائى احنا كنا عايزين جمهور بجد يشجع مش ناس عايزة منظرة وخلاص انا الى مفرحنا فى الموضوع دة ان اشباه الناس دول انضربوا لانهم سبب وكستنا والعرب بيعيرونا بيهم .



الاثنين، 17 أغسطس، 2009

اسالكم الدعاء

ياجماعة بجد انا محتاج دعاكم اووووى انا بمر بختبار صعب هيحدد مستقبلى كلة ياريت تدعولى من كل قلبكم انا ربنا يعدى الحالة الى انا فيها على خير

الأربعاء، 15 يوليو، 2009

الجيل"الموكوس" 80 :91

"
عاوز تتأكد أنك من الجيل الموكوس ؟
اذا كنت عشت الحاجات دي كلها او جزء منها تأكد انك من الجيلراجع معايا كده:1.اذا كان لبسك الصيفي في يوم من الايام مكون من مجموعة تيشرتات (كيلفن كلاين) مضروبة وبناطيل تلجي شارل ستون (يا حبذا لو كانت ماركة انتربول التركية كنت تبقى ملك)
.2.اذا كان لبسك الشتوي في يوم من الايام مكون من مجموعة مختلفة من (الهاي كول) ترتدي فوقها قميص كاروهات أو جاكيت هافان.
3.اذا كنت تعشق مسرحيتي (العيال كبرت) و (مدرسة المشاغبين) وحفظت كل كلمة فيهما ثم فوجئت عند مشاهدهما على الفضائيات ان التليفزيون المصري كان يخدعك طوال هذه السنوات ويعرض لك (ربع المسرحية)
4.اذا كانت الخيارات المتاحة امامك لمشاهدة فيلم في السينما هي فيلم نادية الجندى (نجمة الجماهير) وفيلم نبيلة عبيد (نجمة مصر الأولى) وفيلم عادل امام (مكانش بقى زعيم لسه).
5.اذا كانت الخيارات المتاحة امامك لمشاهدة مسلسل في التليفزيون هي مسلسل أحمد عبد العزيز التاريخي أو مسلسل أحمد عبد العزيز الرومانسي أو مسلسل أحمد عبد العزيز الصعيدي.
6.إذا كانت كل البنات من حولك معجبين بأحمد عبد العزيز ويرينه فارس أحلامهن (رغم قصر قامته وشنبه اللي مش عاطفي اطلاقا).
7.اذا كنت متابعا جيدا لسهرات التليفزيون الممتعة (اخترنا لك - تاكسي السهرة - بانوراما فرنسية)8.اذا كنت شاهدت اثنين او اكثر من حفلات ليالي التليفزيون والتي كان الاعلان عنها يصحبه رقم الليلة (ليالي التليفزيون..الليلة السادسة والعشرين)..حتى جاء الاختراع اللى اسمه مارينا وقرروا ينقلوا الحفلات فيه لتقضى نحبها وتدفن بمقابر الساحل الشمالي.
9.اذا كنت تشاهد عند عودتك من المدرسة أو الجامعة برنامج (أماني وأغاني) لتشاهد أحدث الكليبات المكررة يوميا متحملا في سبيلها سماجة مذيع البرنامج (احمد مختار).
10.اذا كنت تنتظر بلهفة برنامج (كلام من دهب) رغم مذيعه الأكثر سماجة طارق علام.
11.اذا كنت عاصرت مشكلة ادمان الهيروين وحاصرتك تماما في الافلام والمسلسلات والاعلانات والصحف (جميع نجومنا ونجماتنا تقريبا لعبوا دور المدمن وتألموا وهم يطلبون "شمة واحدة" رغم ان المتعاطي لا تصبح حالته بهذا السوء إلا بعد أن يتعدى مرحلة الشم لمرحلة الحقن!).
12
.اذا تكون عاصرت انحسار مشكلة ادمان الهيروين بعد ادراك الشباب لاخطاره واتجاه العاقلين منهم للحل السحري الأكثر أمانا ومتعة (الحشيش)!!!
13.اذا تكون شاهدت على الحجار مرتين في يوم واحد على نفس القناة...مرة العصر مرتديا التيشرت والشورت والنضارة الشمس وهو يغنى (يا اسكندرية يا مدوبانى) ومرة الفجر مرتديا الجلباب والجبة وهو يغني (صلينا الفجر فين).
14.اذا كنت اعتدت ارتداء الكاسكيت بشكل مقلوب حاميا قفاك من الشمس ولم يكن شكلك (بتاع انابيب)!15.اذا كنت تمتلك مجموعة من روايات رجل المستحيل وملف المستقبل وتعتبرها قمة فى الادب..وكنت تقوم باستبدالها من المكتبة باعطاءه العدد وربع جنيه لتحصل على عدد آخر.
16.اذا كنت قد عاصرت الصراع على قمة مبيعات الكاسيت بين عمرو دياب (قبل ان يتجه للعالمية التى لا يؤمن بها إلا هو ومجموعة من محبيه) ومحمد فؤاد (قبل ان يتحول لدب قطبي).17.اذا كنت تترقب بشدة أى حفلة بها فقرة (عزب شو) وتستمتع بحمود عزب وهو يقلد محمد منير ومحمد نوح!18.اذا كنت شاهدت فيلم (جحيم تحت الماء) أكثر من عشر مرات واستمتعت برائعة سمير صبري الكارثية (اضحك يابو علي يا خفيف الدم)!!!!
19.إذا كان قمة الثقافة والعلم في رأيك ان تشاهد بانتظام حلقات برنامج د.مصطفى محمود (العلم والايمان).20.اذا كنت قد مشيت في شوارع المعمورة لتجدها كلها تستمع لأغنية (عبد القادر) للشاب خالد أو (حوا) لمجدي خوري أو شريط (سحراني) لايهاب توفيق.21.اذا كنت قد حضرت فرحا او اكثر اسمتعت فيه لاغنية (بدنا نتجوز عالعيد).
22.أن تكون قد عاصرت قنبلة (كابوريا) التي جعلت كل الشباب يزيل الشعر من جانبي رأسه ليبدو مثل (حسن هدهد) .23.ان تكون (امعانا فى الثقافة الموسيقية) قد اشتريت اصدار او اكثر من شريط الكوكتيل الغربي (واتس ناو).24.ان تكون قد شعرت بحرج بالغ عندما شاهد والدك او والدتك احد حلقات مسلسل (فريندز) معك لما يحتويه على كلام جنسي بذئ (بمقاييس وقتها طبعا!).
25.ان تكون شاهدت كليب المغنية حنان الشهير (اضحك بقى وافرجها ياعم)..واطلقت على المغنية بينك وبين اصدقائك لقب (المعزة).26.اذا كنت تمتلك البومين أو أكثر لتجميع الستيكرز (صور لاعبين كرة أو شخصيات كارتون حسب ميولك وقتها).27.اذا تكون قد منعت لعدة أيام من اللعب في الشارع بسبب خوف أهلك عليك من (السلعوة)!28.إذا كنت قد تابعت بشغف واحد من مسلسلات (ذئاب الجبل - المال والبنون - ليالي الحلمية - من الذي لا يحب فاطمة)29.اذا تكون قد شربت أكثر من مائتي زجاجة كوكاكولا في شهرين من أجل رحلة (البحث عن الجادون).
30.اذا اعتدت في الصيف ان تشغل الكاسيت بصوت عالي عصرا وتقف في البلكونة بالفانلة الداخلية والسلسلة وفي يدك كوب الشاي والسيجارة (لو كنت مدخنا) مستمتعا بسماع الموسيقى ومعاكسة البنات وانت متأكد من أن الحوار الدائر بينهن يدور حول وسامتك!
31.اذا تكون قد استخدمت علبة جيل الشعر كلها مرة واحدة (لو كنت ابن ناس ومعاك فلوس) او قمت بفرد شعرك بكريم جلات (لو كنت ابن ناس برضه بس مش معاك فلوس) لتقوم بزحلقة شعرك ليبدو مثل عمرو دياب في أغنية نور العين.32.اذا كنت قد لعبت في طفولتك باحدى اشكال لعبة (الميكانو).33.اذا كنت قد حضرت امتازت فيه أسماء الشهرة للسيارات الفاخرة بالرومانسية الشديدة (الخنزيرة - التمساحة - البودرة - الشبح).34.اذا كنت قد اشتريت (بلوفر تملى معالك) بالوانه الشهيرة الابيض والاسود والاخضر.35.اذا شاهدت يوميا بعد الافطار في رمضان برنامج (بدون كلام) الذي يقدمه الممثل حسن مصطفى والذى اعتاد ان يستضيف زوجته ميمي جمال في أحد الفريقين وان يتحيز للفريق الذي تشارك فيه ويقوم بتغشيشهم.36.ان تكون قد لاحظت حسن مصطفى وهو يميل على اذن فيفي عبده ليقرأ لها اسم الفيلم في الورقة (لم تكن قد تعلمت القراءة بعد).37.اذا شهدت النجاح الساحق لاغنية حمدي باتشان (ايه الاساتوك ده..اللى ماشي يتوك ده).38.اذا شهدت تحويل نفس الاغنية لاعلان مسحوق غسيل سافو بمشاركة حمدي باتشان والموديل الأشهر في مصر وقتها (نسرينا).
39.اذا كنت قد شهدت انحدار ذوق ذكور مصر لدرجة جعلت وفاء عامر ملكة للأغراء ونهلة سلامة نموذج للأنوثة وجعلت هياتم تغوي جميع الرجال بجاذبيتها الجنسية.40.اذا كنت قد شاهدت نادي الزمالك يترك أفضل لاعب في مصر (رضا عبد العال) يرحل للغريم التقليدي الأهلي بسبب رفض طلبه لزيادة راتبه السنوي برقم ضخم للغاية (خمستاشر ألف جنيه!!!)41.اذا كان المسلسل الكوميدي المفضل لك في الابتدائية هو (بكيزة وزغلول) وفي الأعدادية هو (وانت عامل ايه) وفي الثانوية (يارجال العالم اتحدوا)..خاصة شخصية بطرس منقريوس التي لعبها النجم حسن حسني.
42.اذا طاردتك ايمان الطوخي لفترة من حياتك..تجدها صباحا بطلة لمسلسل الأطفال (كوكي كاك) وعصرا مغنية تقول (انا من النظرة الأولى شفت الدنيا بلون الورد) ومساءا ممثلة تلعب دور استر بولونسكى فى رأفت الهجان.43.اذا كانت الألعاب الألكترونية المتاحة لك تتراوح بين الاتاري الاسود (ابو دراعين كبار) او كومبيوتر صخر التعليمي (صاحب الالعاب السخيفة) أو الاتارى الفاميلى (سوبر ماريو وكابتن ماجد طبعا) أو الأميجا أبو ديسكات (ولعبته الشهيرة سينس بول).44.اذا كنت قد تابعت بشغف مسلسل (الرقص على سلالم متحركة) وتحدثت مع اصدقاءك عن شخصياته (دينا طحن ووديدة صاروخ وناصر اورجنايزر).45.اذا سهرت لنهاية الارسال في التليفزيون المصري واستمعت الى اوتار الليل بصوت عادل هاشم أو مدحت مرسي.
46.اذا شاهدت مسلسلا للمخرج حسام الدين مصطفي ورأيته في أخر التتر بصلعته اللامعة وسلسلتة الذهبية ينظر للكاميرا بابتسامة غريبة وهو يشير بابهامه لأعلى.47.اذا كان مسلسل الأطفال المفضل لديك في رمضان يتراوح بين (سلاحف النينجا) و (باور رينجرز)..48.اذا قمت بتركيب (موتور) لتحريك الاريال فوق السطوح وقمت بتزويده بجهاز (بوستر) لتقوية الاستقبال وسهرت في ليلة صيفية تحرك الاريال بحثا عن قنوات المستقبل والام تي في وسيجما واسرائيل الثانية!!49.اذا كرهت الشخصية التي لعبتها تيسير فهمي في مسلسل (أبناء ولكن) والتي تسببت في تحويل حياة جميع الشخصيات الأخرى إلى جحيم..وفوجئت بها في الحلقة الأخيرة تندم على افعالها وتتحول لحمل وديع ويتصالح الجميع ولا عزاء لمرارتك المفقوعة.
50.اذا كنت قضيت ايام و ليالي بتسمع اغنيه "دي دي" بتاعه الشاب خالد الي كانت مكسره الدنيا و لما كانت تخلص تجيبها تاني من الاول51.اذا كان كل مصروفك ضايع علي الفيديو جيم خصوصا لعبه الديناصورات بتاعه مصطفي و حنان , و عمرك ما قفلتها لحد دلوقت52.اذا كنت ضيعت تحويشه سنه علي سماعتين بايونير بيضاوي و ايكوليزر جينسن و ركبتهم في عربيه ابوك الي كنت بتقلبها منه بليل
53 اذا كنت بتبقي قاعد مستني حلقه مازنجر و بمنتهي البساطه و انت مندمج في الاحداث يقطعوها عشان يجيبوا مجلس الشعب54
الموضوع منقول من منتدى "ماى ايجى " فكرنى بذكريات الطفولة
54 اذا كنت حبيت نجوى ابراهيم "ماكا نجوى " وهى بتقدم برنامج بقلظ

الأربعاء، 8 يوليو، 2009

وامعتصماه


قصة لا تخفى على أحد حدثت في عهد الخليفة المعتصم

قال الرجل القادم للمعتصم : يا أمير المؤمنين : كنت بعمورية فرأيت بسوقها امرأة عربية مهيبة جليلة تساوم روميا في سلعة وحاول أن يتغفلها"يتحرش بها ويرفع عنها ثوبها " ففوتت عليه غرضه , فأغلظ لها "اعتدى عيلها ", فردت عدوانه بمثله , فلطمها على وجهها لطمة فصاحت في لهفة : ـــ واااااااااامعتصماه ـــ فقال الرومي : وماذا يقدر عليه المعتصم وأنى له بي ؟ فأمر المعتصم بأن يستعد الجيش لمحاصرة عمورية فمضى إليها فلما استعصت عليه قال : اجعلو النار في المجانيق وارموا الحصون رميا متتابعا ففعلوا فاستسلمت ودخل المعتصم عمورية فبحث عن المرأة فلما حضرت قال لها :هل أجابك المعتصم قالت نعم .فلما استقدم الرجل قالت له : هذا هو المعتصم قد جاء وأخزاك قال : قولي فيه قولك .قالت : أعز الله ملك أمير المؤمنين بحسبي من المجد أنك ثأرت لي . بحسبي من الفخر أنك انتصرت فهل يأذن لي أمير المؤمنين في أن أعفو عنه وأدع مالي له .فأعجب المعتصم بمقالها وقال لها : لأنت جديرة حقا بأن حاربت الروم ثأر لك . ولتعلم الروم أننا نعفو حينما نقدر . هذا هو مجد أمتنا .......... أمة لا إله إلا الله ........ محمد رسول الله ـ صلى الله عليه وسلم ـ

اين انت يامعتصم لترفع عنا زلنا وعارنا بعد ما حدث للشهيدة مروة . اين انت يامعتصم لتخلصنا من حكامنا الجبناء اين انت يامعتصم لتعيد لنا الكرامة والكبرياء


كنت هكتب بوست عن الحادثة استنيت شوية قلت يمكن الحكومة تتحرك ويرجعوا حق الشهيدة ويلموا كرمتنا الى اتبعترت لكن الحكومة المصرية صامته صمت القبور اذا كان المصرى بيتهان جوة بلدة من الحكومة هيدوروا على الى برة " يارب خلصنا باقى من ولاد التييييت دول الواحد زهق من اشكالهم المقرفة "

فين وزير الخارجية الحنين الى مسك ايد الحيزبون ليفنى احسن تقع اتحرك واعمل حاجة يابجم انطق باى حاجة حسسنا انك موجود ياعم هو الى فى عروقك دة مش دم .

لو الموقف دة عكسى كان زمان الدنيا اتقلبت على الى جبونا ووصفنا بالارهابين والقتلة ويمكن كانوا اعلنوا الحرب علينا


اقل شى يرد لينا كرامتنا ان يعتذروا رسميا ولكن بما يفيد الاعتذار لطفل راى امه تموت امام عينة سيعيش طول عمرة يتذكر هذا المنظر البشع

اذا كان الارهاب ان ناخذ حفنا فنحن ارهابيون

السبت، 20 يونيو، 2009

البنات فى الامتحانات

ياجماعة ردا على بوست الدكتورة ستيتة عن الغش هقولكم على شوية مواقف حصلت معايا فى الامتحانات
بما ان اسمى الى انا بكرهوا بيبدا بحرف الراء فكل اللجنة بتاعتى فى الكلية من اولى لرابعة بنات مفيش غير انا الشاب الوحيد فى اللجنة الله يسمحك ياعمى يلا سمتنى بالاسم دة ماعلينا اول مدخلت اللجنة فى سنة اولى حصلى صدمة اية ياجدعان مفيش شاب معايافى اللجنة نتعاون معاة لننجح مع بعض يلا وقعدت فى اول مادة اتفرج على اللجنة واراقب البنات بتعمل اية بالظبط انا بقى حسيت انى قاعد وسط عصابة مش بنات انا الشباب معندنش الجرائة نعمل الى هما بيعملوة
فى سنة رابعة كان قاعد قدامى بنت اتعرفت عليها فى امتحنات ثالثة عمرى ماشفتها لابسة جيبا ت كلة بناطيل المهم فى تانى يوم امتحانات فى رابعة ببص لاقيتها جاية بمايكرو جيب استغربت بس بعد كدة عرفت السبب
انا البنج الى انا قاعد فية فى نص المدرج وعالى شوية عن بقية البنجات وهى قاعدة قدامى على الطرف يعنى شايف كل الى بتعملة بعد حوالى ساعة من بداية الامتحان لقيتها عمالة ترفع الجيبة قلت البت دى بتعمل اية كل شوية ترفع الجيبة وتنزلها بصراحة هى مزة الشيطان عمال يقلى بص ياعم فرصة وضميرى يقلى ركز فى الامتحان وبلاش قلة ادب

اخوكم قعد مزبهل ونسى الامتحان وكل تركيزة يعرف هى بتعمل اية "الاعمال بالنيات "
قلت يمكن بتعمل اغراء للمراقب علشان يسبنا نغش بضحى بنفسها من اجل سعادة الاخرين مضحية مضحية الصراحة هو دة عطاء الام ابص على المراقب القيه مش معنا اصلا وبيتكلم مع مراقبة فى اللجنة الى جنبنا "ربنا يسهلك ياعم "

قعدت اركز محدش يفهمنى غلط انا بركز اشوف هى بتعمل اية مش بركز على رجليها" الاعمال بالنيات برضوة "

لاقيتها بتعمل اية بقى جايبة استيكر ولزقها على رجليها وبتغش يامعلمين ركزت اوى "برضوة بلاش نيتكوا الوحشة "لحد معرفت هى بتغش انهوا سؤال وقمت منادى عليها
انا : ريم
هى نعم
انا عايز السؤال التانى
هى : ماشى هنقلوا واركن الورقة على جنب وانت تنقل بسرعة
انا :لا يانصحة
هى : امال عايز ايةا
انا : عايز انقلة من المصدر الى بتنقلى من

ضحكت وقالتلى انت بتهزر سبنى اخلص وسبتها تخلص ورجعت انا احل قبل ما الوقت يخلص
برضوة بنت معايا فى اللجنة بعد نص الوقت سمعت صوة ووشوشة عمال ابص جنبى اشوف حد بيكلم حد مفيش اتاريها حاطة السماعة تحت الحجاب وحد بيغششها بالموبايل بس المراقب طلع صايع الصراحة شك فيها وجه من وراها ونادة عليها مردتش علية عرف انها بتغش من الموبايل واتقفشت ومحضر غش .
كان برضوة جنبى بنت متجوزة دى بقى استاذة ورئيسة قسم فى البرشام لو عاملت دكتوراة فى الغش هتاخدها بامتياز مع مرتبة الشرف
مرة عاملة برشام وربطاة باستك على ايديها وتغش منة ومرة فى مكان علوى حساس - فهمنى طبعا _ طول الاربع سنين بتجيب جيد بالغش وعمرها ماتقفشت بتتا لحد رابعة ولدت قبل الامتحانات واتعملها لجنة خاصة وكان بتقتح الكتاب عينى عينك قدام المراقبين لحد اخر مادة فى السنة الدكتور شافها وعمالها محضر غش ودخلت المادة فى الدورالتانى .


مرة جت قبل اللجنة وقالتلى انا معايا برشام بس حاسة انى هتمسك بية النهاردة قلتلها خلاص ارمية ولو عايزة حاجة هدهالك رمت البرشام معرفش فين وبعد ساعة من اللجنة المراقبة شافتنى وانا بتكلم معها ونقلتنى من مكانى لاول بنج ومن حظى لاسود الدكتور بيمر لاقى ورق البرشام على السلالم الى جنبى وخد البرشام وقعد يقلب فى ورقتى لحد ملقى سؤال انا حاله موجود فى البرشام وهوب عايز يعملى محضر غش واحلف له ان البرشام مش بتاعى مفيش فايدة ومن حظى ان خطها كان منيل زى خطى والدكتور قام مدبس البرشام فى ورقتى
بس مراقبة الدور اتحيلت علية شوية لحد ماسبنى وقطعة ورقة البرشام ربنا سترها لانى كنت مظلوم "انا اتكلم مع الى جنبى اه انما اغش من برشام مش من مبدائى "


والى قاعدة جانبى من الناحية التانية برضوة متجوز ومبتجيش مذاكرة نهائى ولا بتعمل برشام واخوكم بيغششها وينطرد كل لجنة بسببها الكل فاكر ان بغش بس العكس وشكلى كان وحش اوى فى الدفعة انا مش شاطر اوى بس كنت بنحج كل سنة

مرة بسالها انتى لية مش بتذكرى تقولى حماتى طول النهار بتخترعلى فى شغل علشان مذكرش وجوزى بالليل قلتلها مالوا جوزك ضحكت وانكسفت "افهموا لوحدكوا " صعبت عليا الصراحة اصلها بتكافح فى جبهتين بس لما زهقت منها قلتلها يتكملى تعليمك ياتطلقى يتكمل تعليمك علشان مش كل لجنة انطرد بسببك


الاثنين، 8 يونيو، 2009

امتى هنوصل كاس العالم

اية ذنب الجمهور دة حرام عليكوا دمنا اتحرق


اه يابلد محتاجة ولد والنبى ياجدعان حد يقولى ممكن قبل ماموت اشوف مصر بتلعب فى كاس العالم انا بصراحه هموت من الحزن والحسرة حرامممم حرامممممممممممممممممممم ياجدعان دى مش اصول لما جيل زى دة ميوصلش كاس العالم يبقى مفيش امل اننا نشوف كاس العالم الا لماننظمها او ايطاليا تنظمها كدة مش حلو بقى بطل افريقيا مرتين مش عارف حتة يتعادل مع الجزائر والله مستوى منتخب الجزائر اقل من العادى امتى بقى هنتخلص من عقدة شمال افريقيا بقى نفوز على الكاميرون وكوديفوار برباعية ونتغلب من الجزائر والله هعيط عاااااااااااااااااااااااااااااااااااااااا .


هو اكيد فية سر غامض ورة عدم وصولنا لكاس العالم يارب حد يقدر يكتشفوا قبل متشل المرات الى فاتت كنا بنقول مجموعة الموت المرة دى مفيش اسهل من كدة مجموعة طب فية ايه والنبى والنبى حد يفهمنى ياجدعان .


نجى للماتش الشوط الاول كان ماشى كويس وكنا مسيطرين وضيعنا فرصتين لابوتريكة وزيدان اية بقى الى حصل بين الشوطين دة لغز كبير زى مايكون اللعيبه اتنوموا مغناطسي


الجزائر نجحت فى استهلاك مصر بدنيا الشوط الاول وهوب من اول هجمة ليهم فى الشوط التانى جون واسم الله عليهم لاعيبة مصر سيبين المهاجم يخترق من على الجنب لحد منطقة الجزاء من غير محد يقولة بتعمل اية ومن هنا بداء الانيها ر وهوب الجون التانى يدخل واسم الله علية الحضرى مش قادر يطلع يضرب الكورة بالبوكس وهوب الجون التالت هو فى اية هواحنا بلاعب البرازيل ولا حاجة .






فى سؤال بقى لية حسن شحاتة استبعد ميدو نفسى فى اجابة منطقية لو متعب موجود كان ممكن يبقى مقبول اما مفيش غير زكى وهو بيلعب مصاب يبقى لية بقى استبعد ميدو مع انه اكتر واحد جاهز فى المهاجمين الاجابة طبعا علشان خاطر عيون زكى زى مايكون المنتخب بقى عزبة كل واحد يستبعد لاعب علشان عيون لاعب تانى من الاخر النفوس مش صافية


لية بقى شوقى يلعب الماتش كلة مع انه بقالة شهرين مبيلعبش مع فريقه مافية حمص واحمد خيرى واحمد حسن اى واحد ينزل من اول الشوط التانى .


احمد عيد عبد الملك منزلش بدرى شوية لية لاازم نستنى المصيبة تحصل وبعدين نغير ومين احمد رؤف دة الى يلعب لوحدة فى خط الهجوم قدام الجزائر ياجدعان ارحمونا من التاليف بقى .


حسن شحاته + اللياقة المنهارة = فضيحة البليدة.


ولكن هل نقد الامل ونلم هدومنا ونروح ونريح دمغنا بقى وننسى كاس العالم دة ومنشتركش خالص فى اى تصفيات ولا نتمسك بالامل الوحيد ونبقى رجاله ونفوز بالاربع مباريات الى جاية ونصعد.


الامل مازل موجود بشرط نبقى رجاله ونحب بلدنا بجد تعالوا نحسبها






لوالجزائر وزامبيا يتعادلوا فى الماتشين بتوعهم مع بعض ويكسبوا روندا والجزائر تخسر من مصر وزامبيا تتعادل مع مصر :


زامبيا 2 التعادل مع الجزائر+3الفوز على روندا +1 التعادل مع مصر+4الرصيد الحالى=10نقاط


الجزائر2التعادل مع زامبيا +3الفوز على روندا+4الرصيد الحالى=9 نقاط


و لو مصر فازت على روندا فى الماتشين والجزائروالتعادل مع زامبيا 9 الفوز على روندا والجزائر+1 تعادل مع زامبيا+1 رصيدنا الحالى =11نقطة يبقى مصر تصعد






لو الجزائر وزامبيا اتبدلوا الفوز على بعض وفازوا على روندا ومصر فازت على الجزائروزامبيا وروندا فى الماتشين


مصر:6 الفوز على روندا+3 الفوز على الجزائر +3الفوز على زامبيا +1 الرصيد الحالى=13


زامبيا : 3فوز على الجزائر+ 3 فوز على روندا +4 رصيدها الحالى =10نقاط


الجزائر: 3فوز على زامبيا +3فوز على روندا + 4 رصيدها الحالى =10 نقاط


كدة برضوة مصر تصعد




اما بقى لو الجزائر فازت فى الماتشين على زامبيا وفازت على روندا وانهزمت من مصر هيبقى 6+3+4=13 نقطة يبقى تتساوى مع مصر فى حالت فوز مصر بكل مباريتها


ولو زامبيا فزت على الجزائر فى الماتشين وفازت على روندا وانهزمت من مصر هيبقى 6+3+4=13 نقطة يبقى تتساوى مع مصر فى حالة فوز مصر بكل مباريتها




وفى حالة تعادل منتخبين فى النقاط بيبصوا على المواجهات المباشرة يعنى احنا لاازم نفوز على الجزائر 2_صفر فى القاهرة ولو لاازم الفوز على زامبيا باى نتيجة




بس السؤال لية دخلنا نفسنا فى الحسبة المنيله دى ماكانت الامور فى متناولنا بس هنقول اية عدتنا ولا هنشتريها




واخر كلمة لحسن شحاته يا كابتن حسن، شيء جميل أن تتمسك ببريق الأمل، و لكن الأجمل هو الاستعداد السليم، الذي يبدأ بحسن اختيار اللاعبين ثم أداء مباريات تجريبية قوية و تدريب اللاعبين على أداء خططي متوازن، فإذا فعلت ما عليك فالكلام عن الأمل سيكون له معنى، أما إذا ما استمر الوضع على ما هو عليه فإن الأمل في الحقيقة هو مجرد وهم كبير




الثلاثاء، 2 يونيو، 2009

ضرب القفا عيب
















انا ياجماعة بركب القطر كل يوم منذ 2002 لما كنت فى الكلية وبعدغبت عنه سنتين ورجعت لية من سنة علشان للاسف شغلى فى القاهرة





القطر دة عالم مختلف مليان بحجات غربية وعجيبة جدا القطر بتاع الغلابة الى يطلق علية مجازا قطر ممميز انما القطر المكيف او الديزل فدول ناس تانية ملناش دعوة بيهم خلينا مع الغلابة





القطر دة بيشيل ناس من محافظات مختلفة تلاقى بشر من كل نوع الطلبة على الموظفين على الصنايعية على البيعين السريحة يعنى من كل فئات الشعب المصرى المطحون بيحصل موافق غربية جدا





يعنى النهاردة وانا جاى فى القطر كان زحمة مووت وجات وقفتى جت جنب الباب وكان جنبى مجموعة من الرجال الى بصراحة مش رجالة خالص وهتعرفوا لية





المهم القطر اتحرك من محطة بنها وعينك ماتشوف الا النور راجل عندة حوالى 45 سنة جسم اية حيطة حيطة يعنى الى يشوفه يخاف من وحوالية مجموعة تانية من الرجالة وهوب الاقى الرجالة دول كل واحد منهم يضرب الراجل الحيطة دة سورى يعنى على قفاة انا قلت الراجل بقى هيثور لكرامته وهيدور فيهم تلطيش ابدا دة كان بيضحك انا كنت عايز اقولة كلمة ابيحة بس بصراحة مسكت نفسى بالعافية وقعدت اتفرج على بقيت المسرحية على الطماطم الراجل دة انضرب على قفاة حوالى اكتر من ميت قلم انا قلت يمكن مجنون ولا اهبل مش فاهم ابدا دة طلع عاقل من كلامة وتتوالى الصفعات ويواصل الضحك وكل الى قدر يقولة ياجماعة كقاية هزار بصراحة مقدرتش امسك نفسى وقولتلة هو انا عندك حاجة اسمها كرامة ولا متعرفهاش قالى دول زمايلى فى الشغل وبنركب مع بعض كل يوم وبنهزر عادى










انا بصراحة كنت هتشل بقى راجل عندة 45 سنة وينضرب على قفاه ويقول عادى ولا بلاش الراجل دة تلاقية عامل اسد على مراتة وعيالة فى البيت وبينضرب فى القطر بجد حاجة تقرف










المهم المعلم دة جاتلوا فرصة ان يدخل جوة القطر ويهرب من الضرب بس صراحة هو كان مصمم ان ينضرب لاخر نفسى واية كمان ده كان لابس جلبية فلاحى يعنى من غير لياقة علشان قفاة يبقى جاهز للضرب الراجل بعد شوية تقريبا خد كفايتة من الضرب فقام شاتم الى بيضربوة وقالهم كفاية كدة فلما واحد منهم رد عليةالشتيمة قال بسلامتة انا الراجل الوحيد فى القطر وكلكم لامؤاخدة "خ" افهموا لوحدكم بقى انا بصراحة جبت اخرى وقلتلة كلمة عيب عندنا ومش عيب فى اسكندرية بقى انت راجل يبقى علية العوض فى رجالتك يامصر

وعلى رائى المثل "وشك شين وقفاك مصدي تضرب فيه البلغة تعدي"



نسيت اقولك ان فى المربع الاول جنب الباب كان فية بنات بصراحة انا كنت مستمتع برد فعلهم على الفرجة على المسرحية اكتر من المسرحية نفسها تعبيرات وشهم كانت تموت من الضحك واحدة منهم جاتلها هستريا ضحك وكانت هيغمن عليها من كتر الضحك





وبنت تانية تقول والله الراجل صعبان عليا وهو لو عياله شفوه وهو بينضرب كدة هيحترموه

وواحدة كبيرة قالت مثل جامد " ضرب القفا عيب حتى لو فى لامؤاخدة حمار "








الموقف دة خلانى اصدق ان القفا بيستحمل كتير وان محمود عبد العزيز كان معاة كل الحق انه يغنى للقفا "اه ياقفا اة ياقفا "




















الخميس، 21 مايو، 2009

التاج الاول صعيدى

وصلنى التاج الاول من امورة الصعيد مروة صاحبة مدونة " ملقتلهاش عنوان "

من أنت؟
انا شاب مصرى عادى " مش هقول اسمى لان فية واحد من قريتى عايزوه يعرف لوحدو انا مين زى مانا عرفته وحاجة كمان انا مبحبش اسمى ونفسى اغيره

وما الذى تفعله هنا؟
بجاوب على التاج الاول واحلى حاجة فية انه قادم من صعيد مصر

إسرائيل تقصف كل جنوب ممكن بحثا عنك ، أى شمال تقصد؟
لان اغادر مكانى وادافع عن نفسى لاخر نفس دانا نفسى اقابل ولاد الكلب دول بس منه لله الى حارم الشباب المصرى من الدفاع عن ارض المسلمين


أنت مكلف بحذف حرف من حروف اللغة العربية .. أيها ستختار ولماذا ؟
ولا حرف لان دى لغة القران
لو قدر لك أن تدخل السجن فما هي القضية التي تتمنى ان تدخل بها إليه؟
قتل كل الحكام العرب الى باعواالقضية الفلسطنية
-نحن لا نعيش حياتنا بل نتعلم فيها كيف نعيش ما تعليقك؟
طبعا صح الانسان طول عمرة بيفضل يتعلم اشياء جديدة تساعدة انه يعيش فى الدنيا لحد مايموت على راى المثل " يموت المعلم ولا يتعلم "

على مفترق طريق لافتتان ، اليمنى تقول ( إلى حلمك ) واليسرى تقول : (إلى مالم يحلم به البشر ) ، أي الطرق ستسلك؟

الى حلمى طبعا احقق حلمى الاول وبعدين ابقى اشوف اية احلام بقى البشر
-بجملة واحدة فقط أكتب تعريفاً لكل كلمة من الكلمات التاليه
-الوطن

الحب الكبير والحضن الدافى
-الأم.
منبع الحنان
-الليل
الهدوء والراحة

-الحب
لسة مجربتوش

أمريكا
الظلم يتجسد فى صورة دولة لاتعرف العدل ولامعنى الانسانية
المرأة
نصف المجتمع الجميل تتحمل الكثير لتربية النصف الاخر
-الرجل

عملة اصبحت نادرة فى مصر والمنطقة العربية خصوصا فى فئة الحكام
-الصمت
نعمة كبيرة من الله " اذا كان الكلام من فضة فالصمت من ذهب "
-أخترمنصباً واتخذ قرارا؟
رئيس الجمهورية " قطع جميع العلاقات مع الكيان الصهيونى والغاء اتفاقية السلام
قيس، عنترة، جميل.... الذين يقولون شعرا..... وليلى وعبلة وعزة"صموت"لماذا هذا التغييب للمرأه

لان المراة تفضل سماع كلمات الحب والغزل اكتر من ان تقوله

-األى أين تمضي كلمات الحب .. بعد أن نقولها?
اذا كانت صادقة تصل الى القلب اما اذا كانت لتسلية فتذهب مع الريح
- هل تجد علاقة بشكل أو بآخر بين المرأة وقطاع الطرق ؟
قاطع الطريق بقشطك مرة واحدة المراة بتقشطك طول العمر
-هذا فراق بيني وبينك .. متى ولمن تقولها ؟
لكل شخص لايصون الصداقة

كيف هو غداً ؟

المستقبل بيد الله ولكن اتمنى ان يكون افضل من اليوم

تمرر التاج لمين
الشعب لابد له من حكومه تشكمه
عالم حكاوى
صيدلانيه طالعه نازله

ع ـيـَـَـَـَش ا[ح]ـلآ مـِـِـِـآفي اللحظهً }" مونى الشريف "

الثلاثاء، 12 مايو، 2009

مصر والفتنة النائمة


ياجماعة موضوع الفتنة الطائفية التى تظهر كل قترة فى مصر موضوع خطير نحن نغض الطرف عن منذ فترة لابد من نفتح هذا الملف


للبحث عن اصل المشكلة حتى لاياتى يوم نكون فية مثل العراق او لبنان من خلافات بين الطوائف المختلفة داخل البلدان


مصر طول تاريخها يعيش فيها المسلم والمسيحى كاخوان لكن فى السنين الى فاتت الموضوع تغير تماما بقى فية حساسية واحتقان بين


الطرفين وموضوع ان شيخ الازهر والبابا يظهروا فى الاعياد ويتبادلوا القبل والاحضان اصبح مظهر تمثيلى سخيف


فية نار تحت الرماد تنتظر اى فرص لتكتسح مصر بكاملها


الحادثة الى حصلت فى حلمية الزيتون " أعلنت مصادر أمنية انفجار عبوة ناسفة بدائية الصنع في سيارة متوقفة أمام كنيسة بحي حلمية


الزيتون الواقع شرقي مدينة القاهرة، ما أدى إلى اشتعال النيران في السيارة، وتم إبطال مفعول عبوة أخرى.

ومن جانبها قالت وكالة أنباء الشرق الأوسط المصرية الرسمية: إن قوات الحماية المدنية بالقاهرة تمكنت من إخماد حريق شب بإحدى

السيارات أمام كنيسة العذراء بالزيتون دون حدوث أية إصابات." اقباط المهجر بداوا فى استخدام هذة الحادثة للقول بان مصر فيها فتنة

طائفية واى حادثة منذ فترة زى حادثة محل الذهب الى مات فية مسحيين صور ايضا على انة فتنة طائفية فضلا عن حوادث اختفاء بنات مسحيين بعد قصة حب مع شاب مسلم


المسحيين فى مصر يشعروا انهم غرباء فى بلدهم والمسلمين شايفين انهم واخدين اكبر من حقهم الموضوع بجد خطير

اكتر حاجة ضيقتنى موضوع دبح الخنازير بعض المسحيين صوروة على انة فتنة طائفية وبعضهم هددوا باللجوء الى امريكا ياجماعة هى امريكا لوجت هتفرق بين مسلم ومسيحى الكل هيموت تحت نيران الجيش الامريكى واقباط المهجر بيسخنوا الغرب على مصر فى موضوع الخنازير ودة نص فقرة من احد خطابتهم حول هذا الموضوع تقول بالنص:
«ويشترى ١٠ ملايين قبطى لحم الخنزير ومنتجاته لرخص ثمنه وحلاوة طعمه، بينما يرفض أحفاد الغزاة العرب المسلمين والذين يحتلون مصر، بمن فيهم حسنى مبارك الذى تمت فى عهده أبشع أنواع الجرائم من قتل ونهب وتهميش الأقباط وخطف بناتهم وأسلمتهن وأسلمة التعليم والقضاء والشرطة والسلك الدبلوماسى والذى أراد إنهاء عهده الظالم ضد الأقباط بإعدام ٢ مليون قبطى يتعايشون من الخنازير ويحرم الأقباط من أكلها».


طالما الوضع وصل لكدة يبقى لاازم نبتدى نشوف لية الوضع وصل لحد كدة ونحط حلول جذرية للمشكلة بدل ما يجى يوم نلاقى مصر بقى فيها حرب طائفية وساعتها محدش هيخرج من سليم الكل اكيد هيخسر سواء مسلم اومسيحى النار ستلتهم الجميع

بعض الخطباء فى المساجد والقساوسة فى الكنائس بيلعبوا دور مش حلو فى الموضوع دة محدش يقدر ينكر ان فية متطرفين من الطرفين

زى زكى بطرس الى بيطلع على قناة الحياة على القمر الاوربى الراجل دة نموذج واضح بيهاجم الاسلام بصورة مقرفة وفية خطباء مسلمين يحدثوا على مهاجة المسحيين والاعتداء عليهم

هحكلوا على موقف حصل ليه مع راجل مسيحى عجوز فى محطة بنها

كان فية مجموعة شباب قاعد بيتقريق على الراجل الكبير دة لقيتة فى قمة الغضب وبيقول البابا شنودة هو الى خلا المسلمين يتحكموا فينا

انا : لية ياحاج

الراجل : لانه كل مامريكا تساله عن اضهاد المسحيين فى مصر ينكر لانة بيخاف من مبارك و منكم

انا : احنا مين

الراجل : المسلمين

انا : هى العملية بقت احنا وانتم احنا طول عمرنا عايشين مع بعض

الراجل : لا دى تمثلية تعال شوف عندنا فى بلدنا اسمها "تلونا " تبع الباجور منوفية المسلمين حرفوا الكنيسة علينا واحنا بنصلى يوم الاحد بس الشباب بتاعنا هيرد عليهم يوم الجمعة

انا : بس مش علشان فى ناس متعصبة نحولها لحرب ونبعت لامريكا هى يعنى لوجت هتفرق بين حد الكل هيضيع مسلم ومسيحى

الراجل : بس برضة احنا مش هنسيب حقنا

الموقف دة اثبتلى ان النار تغلى تحت الرماد ومنتظرة اى شى لاحراق مصر ربنا يستر على بلدنا فى السنين الى جاية " الفتنة نائمة لعن الله من ايقظها

ياريت اعرف رائيكم فى الموضوع واية الحل المناسب ليه

الأحد، 10 مايو، 2009

حان وقت الرحيل


رحل جوزيه بعد مشوار حافل بالانجازات مع القلعة الحمراء رحل والفريق فى طور بناء جيل جيل يقود ابناء الجزيرة الى انجازات جديدة

كلنا كاهلوية بلا استثناء نعشق هذا الرجل هو بحق اسطورة فى عالم التدريب كلنا يحمل له كل احترام وتقدير واعتراف بانه اسعدنا كثيرا و

الانجازات التى حققها مع الاهلى تشهدعلى هذا

انا شخصيا من اكثر الناس حبنا له ولكن هنال سؤال لابد من طرحة هل هذا هو الوقت المناسب لرحيلة عن الاهلى او بمعنى اصح اعلان خبر رحيله انا كنت اتمنى رحيل جوزية من الموسم الماضى ولكن ان يتم اعلان خبر الرحيل قبل لقاء الحرس فهذا ما لااصدقة التوقيت خاطى جدا وبصراحة كدة ربنا يستر النهاردة لان لاعيبة الاهلى اكيد هيتاثروا نفسيا مهما حاول الخطيب او حسن حمدى ان يحفزوهم لانهم ارتبطوا بجوزيه بصورة كبيرة واكيد اعلان خبر رحيله فى هذا التوقيت خاطى جدا لماذا لم ينتظرجوزيه حتى نهاية الدورى ويعلن الرحيل


ان حاسس ان فى حاجة مش طبيعيه بمعنى ان جوزيه عندة احساس قوى بخسارة الدورى فقرر الرحيل قبل اقالته

من الواضح انه يهرب من تحمل مسئولية ضياع الدورى انا لااهاجمة ولكن دعونا نتحدث بصراحة

جوزيه طوال الخمس سنوات الماضية ركز على مجموعة من اللاعبين حتى استهلكوا تماما واصبح مستقبل الفريق مظلم وغير واضح المعالم

هنالك تصريح مورينهو مدرب الانتر حول مانويل جوزيه قال فيه " جوزيه مدرب كبير ولكن يترك الفرق وهى كالصحراء القاحلة "

وهو وضع الاهلى الان لاعبين مستهلكين ومجموعة اصابها الجمود من الركنة على الدكة وخلافات كبيرة مع مجموعة اخرى واصبح الفريق على صفيح ساخن ينتظر انفجارة فى اى وقت


انا ارى ان رحيله بنهايه الموسم فى صالح الاهلى تماما لعدة اسباب اولها ان جوزيه منذ عام وهو فاقد التركيز يجلس ويشاهد المباريات مثله مثل المشجعين اصبح عاجز عن اجراء تغيرات تحدث انقلاب فى المباريات مثلاما عودنا فى السنوات السابقة



ثانيا :طريقة لعب الاهلى بات كالطبيخ البايت الكل حفظها عن ظهر قلب لم يعد لدية اى جديد ليقدمة للفريق فمن الافضل ان ياتى مدرب جديد بفكر جديد يطور فى اداء الاهلى

ثالثا : الاهلى الان فى طريقة الى بناء فريق جديد فمن الافضل وجود مدرب يستمر مع الفريق لمدة موسمين او اكثر حتى يشتد عود الفريق الجديد ويكون قادر على حصد البطولات

رابعا : علاقة جوزيه بكثير من اللاعبين غير طيبة واصبح يحب هذا ويكر هذا وهو مااثر بشدة على اداء الفريق بشكل عام لرحيل لاعبين كان الاهلى فى اشد الحاجة اليهم نتيجة خلافاتهم مع جوزيه مثل شوقى وحسن مصطفى ورامى عادل وغيرهم

خامسا : قتل جوزيه الطموح فى قطاع الناشئين بالنادى واصبح حصول لاعب صغير على فرصة مع الفريق الاول شبة معدومة ورحل لاعبين جيدين كانوا سيفيدوا الفريق مثل شريف اشرف وشبيطة وغيرهم

سادسا : اصبح الاهلى غير جاذب للاعبين الكل يخاف ان ينضم للاهلى فيكون مصيرة دكة البدلاء

ولهذة الاسباب ارى ان رحيلة فى صالح الاهلى وان كان القرار تاخر الى مدة عام

فى النهاية نقول لجوزيه شكرا على كل ماقدمت للاهلى وجماهيره من بطولات وانجازات انت وان اختلافنا معك اعظم من درب الاهلى على مدار تاريخة احببناك بشدة وسنحزن على فراقك ولكن الاهلى لن يقف على احد اتيت والاهلى نادى القرن وسترحل والاهلى اكبر واعظم اندية القارة السمراء وسيظل هكذا الى يوم الدين وداعا يامن احبناك واحببتنا وداعا يامن اسعتنا وابكيتنا وداعا ياملك لن ننساك مهما طال الزمن

اطالب لاعبى الاهلى بالفوز بالدورى ليكون خير ختام لمشوار الرجل مع القلعة الحمراء



الأربعاء، 6 مايو، 2009

اة منوفى .. انت مالك

بما انى منوفى ودى مدونتى فى من حقى انى ادافع عن المنوفية بقى
بصراحة انا مش فاهم الناس بتكرة المنوفية لية دانا لو قلت لواحد انى منوفى يحصلة حالة اشمئناط "مش عارف معنها " ما علينا ويفتح بقة ويقول منوفى اعوذ بالله لية يامور هو احنا يهود ولا حاجة اة انا منوفى ان مالك
بصوا انا من بركة السبع ومدينتى مكنتشى تبع المنوفية كانت تبع الغربية طنطا يعنى والسادات امر بضمها للمنوفية اول مامسك الحكم يعنى الجينات الى جوايا مش منوفى خالص بس انا بفتخر بانى منوفى ومش شايف ان دة عيب . كل مكان فية الحلو والوحش وفية الكريم والبخيل
انا مكنتش حاسس بموضع كرهة المنايفة الالما روحت الكليةفى بنها انا كنت بسافر اسكندرية كتير بس محستش بالموضوع دة خالص لان اسكندرية معظمها منايفة وخصوصا بحرى والى مش مصدق يروح بحرى ويشوف بعينة .
مرة وانا فى الكلية كن قاعد مع زميلى بنت من المنوفية "نورا " وشاب من الشرقية" حسن "
فبتاع الشرقية بيسالنا يعنى اية معنى "س ح م" الموجودة على كل القطارات
انا " سكك حديد مصر
نورا " سوزان حسنى مبارك وجوزها مسيطها فى السكة الحديد "
حسن " لا اقولكم ومحدش يزعل منكوا
انا : قول يابنى هنزعل لية
حسن : يعنى "سياتك حمار منوفى "
انا : نعم انت اهبل يالا ولا اية مين الى حمار يابنت التيييييت
حسن : والله مش قصدى انت بس هى بتتقال كدة وانت قلت مش هزعل
نورا : بس انت كدة غلط فى كل المنايفة هما عملولك حاجة
حسن : ياجدعان مش قصدى
انا : طب انت تعرف معنى "ش ك ع "
حسن : لا
انا : شرقاوى كورك عبيط ياعبيط يابن العبيط واحدة بواحدة انا منوفى ولاازم اخد حقى
برضة نبقى ركب القطر واول ما محطة قويسنا او بركة السبع تجى تلاقى واحد امور يقول دخلنا تل ابيب لية كدة ياجدعان هو احنا بقينا اسرائيل ولا اية
اسمعوا النكتة دى واحد بيسأل واحد صاحبه : ياعم الاسرائيليين لما كانوا بيحاربوا مصر ضربوا كل المحافظات ما عدا المنوفيه !!!قاله أكيد يعني اليهود مش بيضربوا بعض
بقى احنا يهود ياجدعان السادات بطل الحرب والسلام يهودى ينفع كدة والله اكتر الجيش المصرى من المنوفية لان المنوفية كلها رجالة

والى يقول 048 الى هو مفتاح تليفونات المحافظة " دة مفتاح جهنم " على اساس اننا كلنا كفرة بقى ودخلنا النار "

وواحد
امور تانى يقول "واحد منوفي دخل الجنة باع بيته وراح سكن مع ابوه في النار" دة مش كلام كفر وضد الاسلام فى حد هيبيع نصيبة فى الجنة ويروح النا هى الجنة ملكنا يابن الهبلة

وتالت واحد منوفي بخيل اشترى بربع جبنة وحطه ف كيس وعلقه ف السقف وكل يوم يجيب عياله يبصوا على الجبنة ويتغدوا , وف يوم اتأخر رجع لقى العيال اتغدوا فسألهم ازاي قالوا احنا كنا بنبص من خرم الباب على الجبنة وناكل قال لهم ياولاد الكلب انتو مفيش يوم تاكلوا حاف ابدا" بقى دة مش هبل والله ياجدعان احنا مش بخلة دة لوجلنا اى حد من قريبنا من اسكندرية اودمنهور بنشيلة من على الارض شيل ونبقى عايزين نجبلوا الدنيا تحت رجيلة نفسى الى بيتكلم عن بخل المنايفة ينزل زيارة واحنا نورية الكرم على اصولة

والى المنايفة بيمتازوا بالذكاء العالى اكتر نسبة تعليم موجودة فى المنوفية عندنا نسبة خريجى الجامعات عالية جدا عندنا اعلى طب فى الجمهورية بياخد من 98% وعندنا اصعب تجارة على الجمهورية يعنى الى بيتخرج منها بيبقى فى قمة الذكاء كل طفل منوفى بيبقى حلم عمرة ان ياخد مؤهل عالى ويلاقى فرصة يقدر بيها يحقق نفسة لاننا بصراحة بنحاول نحسن من مستونا مش معنا كدة اننا بتهرب من اطلنا اننا فلاحين ابدا احنا لانا الفخر انا فلاحين بس الفلاحة معتدتش بتجيب همها بفضل سياسات الحكومات الحكيمة وكمان من حق اى انسان انة يحلم بمستقبل افضل طالما بالحلال شوف تجارب المنا يفة اى شاب منوفى بيبدا من تحت الصفر وبمجهودة ودماغة العالية بيقدر يحقق كل الى هو عايزة


المحافظة دى اخرجت عباقرة كفاية انى انا منها هههههههة غرور بقى وحسب اللة برضوة منها حتى اسالوا ستيتة هانم ومحمد أنور السادات بطل الحرب والسلام إبراهيم عيسي رئيس تحرير جريدة الدستور "قويسنا " الشيخ القارىء الشهير عبد الفتاح الشعشاعي (أول من قرأ القرآن مرتلا في المسجد النبوي و من أوائل قراء الإذاعة المصرية الذين سجلوا القرآن بصوتهم) الشيخ القارئ الشهير محمود على البنا والكاتب الساخر محمود السعدني وعبد العزيز فهمي - أول وزير عدل مصري ووضع دستور 1923.الدكتور كمال الجنزورى - رئيس الوزراء السابق. مصطفى كامل مراد رئيس حزب الأحرار الراحل وأحد الضباط الأحرار محمد حسني مبارك انا مكنتش عايز اكتب اسمة لانة عار مش شرف لينا الأديب إبراهيم عبد القادر المازني واللواء أحمد رشدي وزير داخلية أسبق والاعلامى الكبير حمدى قنديل من بركة السبع. محمد عبد الغني الجمسي وزير الحربية الأسبق فين ناس كتير عظماء من عندنا بس كفاية كدة

الحاجة الى مكسوف منها ان نادية الجندى من عندنا دة عار ياجدعان كدة شرفنا متفرق بين القبائل دة مفيش ممثل الا لما ظبطها انتقم لشرفى من مين فيهم بقى


الخميس، 30 أبريل، 2009

بواسير السمك

  1. بعد انتشار مرض انفلونزا الطيور والخنازير فى الايام القادمة هيظهر مرض بواسير السمك ودة المرض المنتظر هى يعنى جت على السمك مالبقر اتجنن والفراخ جالها دور برد والخنازير عندها زكام من حق السمك ياخد فرصتة فى الملعب ويعبر عن امكانياته ويورينا بقى هيجيب كام جون يعنى هو هيفضل احطياتى زى دروجبا وحسن على كلا وحشا وماشا دانا حاسس ان السمك هيكون هداف دورى الامراض وهيكتسح كل الى هيقبلوا وهتبقى هيصة هو صحيح السمك صغير بس جبار ويوضع سره فى اضعف سمكة .
المرض دة لوانتقل للبشر هتبقى فلة اوى وهيساهم فى حل مشكلة المترو فى مصر واحد يسالنى ويقولى ازاى اقولة بص يابرنس الكراسى فى المترو هتكون فاضية لان كراسى المترو ناشفة و المؤخرة الى فيها بواسير هتتوجع اوووووووووى يابيبى والى مشى عندة المرض هتبقى فرصتة للانفراد والظفر بالكرسى وهتلاقى الشباب سايب الكرسى لكبار السن والبنات مش شهامة ولكن تحت شعار مجبر اخاك لاشهم ويمكن بمرور الايام نتعود وترجع الشهامة ياجدعان
وكمان القاهرة هتبقى فاضية لان مفيش عربيات لاملاكى ولا اجرة لان الكل هيفضل السير على الاقدام محافظتنا على الموخرة الغالية
وكدة ياجدعان مش هيزيد عدد النباتين فى البلد لان فى الاساس مفيش لحمة وكمان مفيش سمك والناس جسمها هيبقى رياضى على النعمة المرض دة فية خير كتير لمصر
بس خليكوا فكرين انا اول من نوة عن هذا المرض ولية براة اخترع

الأربعاء، 29 أبريل، 2009

الفراخ البيضا بتساعد الكتاكيت



بغض النظر عن انى اهلاوى بس بصراحة الى حصل فى استاد القناة امبارح شى يكسف الواحد كان حاسس انه بيتفرج على تقسيمة مش ماتش كورة بقى هو دة الزمالك الى قطع الاهلى وارهق جوزيه تحس ان الاعيبه ملهاش نفس تجرى بالذمة الجون التانى بتاع الاسماعيلى دة جون احمد مجدى بيدى الكورة لمصطفى كريم يقولة هات كون والنبى يا بيبى العملية كانت مكشوفة اووووووووووووووووووووووى فين حازم إمام وجولاته فين الميرغني وتحركاته فين رحيل فين عبد الواحد المتألق فين وفين عبد الواحد بعد الجون التالت بيضحك ياحلاوة ياولاد الله يرحم ايام النزاهة والشرف وقال اية الاخ سامى الشيشيني مش عاجبه وبيتهم قناة الاهلى بتسخين الاجواء اى اجواء ياامور وعلى راى ابويا ان طلع العيب من اهل العيب ميبقاش عيب بس نرجع ونقول منك لله ياجوزيه وحياة النبى هى البرتغال مش وحشاك ياريت تروح تزوها ومترجعش وهديلك فطير من المنوفية كمان انت السبب فى كل دة ركزت على مجموعه لاعبين لحد ما استهلكوا حتى التغيرات بقت محفوظة يا جودعان انا دمى الى اتحرق دة مش ببلاش دة دم منوفى يعنى مش بساهل كدة يتحرق

الثلاثاء، 28 أبريل، 2009

الاهلى حرق دمى

انا يجماعة بحب الاهلى اوووووووى وبصراحة كدة الوضع اصبح لايحتمل بقى جة اليوم الى الاهلى ملك افريقيا يتحايل على الزمالك انو يفوز على الاسماعيلى علشان الدورى بصراحة مستوى الاهلى زفت مفيش لاعب واحد فى مستواة فين ابوتريكة فين بركات فين احمد فتحى تحس انهم وهما بيلعبوا شاربين حاجة اصفرة لا قادرين يجروا ولا فية باصة واحدة توحد ربنا صح نفسى اعرف هو فية اية

جوزيه بقى زية زينا مش عارف يعمل اية بيبقى قاعد على الدكة يتفرج وخلاص ارحمونا يابشر دمنا اتحرق مش مقتنع بموضوع الارهاق والكلام دة بقى اسطوانة مشروخة هو الارهاق دة من بداية الدورى متشات كتير من اول السنة الاهلى فيها كان زفت
امبارح انبى تعب الاهلى وياعم رمزى جبتك ياعبد المعين هى نقصاك انتى كمان دحنا بنجيب الجون بالعافية وبطلوع الروح
كدة الدورى فى خطر ويارب ميتكرر سيناريو 2002 ونخسر الدورى فى اخر ماتش يومها كان صابح عليا امتحان ومعرفتش اذاكر وجبت مقبول بالعافية
ياعم جوزبه ابوس راس سياتك ارحمنا من الاختراعات وركز شوية وحاول تغير فى التشكيل كفاية الى شوفناة يوم ماتش الزمالك شوية عيال بعطروا بكرمتنا الارض . ورحمه خالى حسن ان الدورى ضاع لاعلان الاضراب حتى يعود الدرع الى بيتة ومطرحة فى الجزيرة وقد اعذر من انذر

بداية القصة

انا شاب مصرى من محافظة اخرجت عظماء رغم انها محافظة مظلومة عندى 23 سنة خريج اداب صحافة من جامعة بنها عملت المدونة علشان اقول الى جويا بسافر كل يوم بالقطر بشوف عجائب وغرائب نفسى اشوف بلدى اجمل لانى بحبها موت ممكن تقبلونى