ياشهيد نام واتهنى .. هما فى نار وانت فى جنة

ياشهيد نام واتهنى .. هما فى نار وانت فى جنة

الخميس، 28 يناير، 2010

الفراعنة يمسحون بالجزائر بلاط انجولا..ارقصى ياخضرا لامش قادرة



محدش يحوشنى ولايمسك ايديا اربعة يابشر اربعة ياقوم اربعة ياجزائريين  مش 1 و2 ولا3 اربعة يا ال كسيلة عندما نلعب فى اجواء رياضية تعرفوا منهم المصريين ربنا اكبر من كل الجميع


123 اكتسحنا اللجيرى 

ارقصى ياخضرة لامش قادرة


هو دة عدل ربنا هو ده الفرق الحقيقى بين مستوى منتخب الساجدين ومنتخب الهمج الجزارين

مصر هى المنتخب الذى يستحق ان يمثل افريقيا فى كاس العالم منتخب بدون ابوتريكة وبركات وميدو وشوقى يكتسح الجزائر ونيجيريا والكاميرون ولكنها ارادة الله وانشاء الله يكون كاس افريقيا تعويض بيسط 

ربنا يحمى الحضرى وجدو واحمد فتحى الجندى المجهول والقائد الاعظم احمد حسن 


زيانى بيقول : اه يانى يانى يانى ..مش هلعب كورة تانى


عايز تهدوا هاتلو جدو .عايز تغيزوا هاتلو زيزو

الخميس، 14 يناير، 2010

لو لم اكن مصريا لوددت ان اكون تركيا


مش هقول اكتر من كده"لو لم اكن مصريا لوددت ان اكون تركيا " اول مرة اشوف اسرائيل بتعتذر لحد



 نص رسالة الاعتذار كما نشرها الموقع الالكتروني لـ "اذاعة صوت إسرائيل":







سعادة السفير السيد أحمد أوغوز تشليكول






سعادة السفير !






أودّ أن أعبّر عن احترامي الشخصي لكم وللشعب التركي وأؤكد لكم انه - رغم وجود خلافات في الآراء بيننا حول بعض المواضيع - فانه لا يجب بحثها وحلها الاّ عبر القنوات الدبلوماسية المفتوحة والمتبادلة والمحترمة بين حكومتي بلدينا.






لم أقصد إذلالكم شخصيا فانني أعتذر عن الطريقة التي تم بها تنفيذ الإجراء وإدراكه. الرجاء لطفًا نقل هذه الرسالة الى الشعب التركي الذي نكنّ له كل الاحترام.






يحدوني الأمل في ان تسعى اسرائيل وتركيا على حد سواء الى ايجاد القنوات الدبلوماسية واللطيفة لنقل الرسائل كما يجب على دولتين حليفتين القيام به.






وتفضلوا بقبول فائق الاحترام






داني أيالون


نائب وزير خارجية اسرائيل


السبت، 2 يناير، 2010

انتى مين فيهم يامصر

بصى بقى يامصر انا ابنك صح نفسى اسالك شوية اسئلة بس وحياتى عندك يامصر تجاوبى عليا وتكونى صدقة معايا لانى بحبك وعايز اعرف انتى مين بالظبط .

 انتى مصر ام الدنيا الى حضارتك واصلة ل7تلاف سنو ولسة العالم مبهور بيها لحد دلوقتى ؟ ولاانتى مصر دولة من دول العالم التالت المتخلف الى مليان فقر وبطالة وامية وامراض وفساد وديكتاتورية ؟


 هو انتى مصر الاخت الكبرى زى مالناس بتقول للدول العربية  وانتى بنيتى وكبرتى وعلمتى ولاانتى لاكبره ولا حاجة وده وهم عايشة فيه انتى وولادك والحقيقة انك مكروها وملكيش اى دور ؟

هو انتى مصر الجمهورية الى فيكى انتخابات رئاسية وبرلمانية نزيهة ولاانتى مملكة  والحكم هيورث غضب عن عين التخين وهيجى اونكل جمال بعد بابا مبارك والى مش عجبة  يدور على اى حيطة يضرب دماغة فيها ولا مش عايز يضرب دماغة يشرب من البحر  ؟
هو انتى مصر الى الى حاربتى اسرائيل 48 و56 و67 و73 ومات من ولادك الاف ولا انتى مصر الى عملتى سلام مع اسرائيل ورجعوا هما لسيناء من غير حرب لو مش مصدقانى روحى شرم الشيخ والله يامصر كلها اسرائليين وولادك علشان يدخلوها لاازم تصريح شوفتى خيبه اكتر من كدة ؟

هو انتى مصر الى ساندت فلسطين فى صراعها مع اسرائيل ولاانتى مصر الى بتبنى جدار عازل فولازى على الحدود علشان يزيد حصار الفلسطنيين فى غزة ويجعوا ويتشردوا اكتر واكتر اقولك حاجة يامصر حسبى الله ونعم الوكيل  فالى فكر فى الجدار دة والى خد قرار بناه والى هيبنية يارب كلهم ينشلوا قبل مايعملوه  .

هو انتى مصر الى ازهرك علم ملايين المسلمين وخرج علماء علموا الدنيا الاسلام الوسطى ولا انتى مصر الى ازهرك رئيسة بيحارب النقاب وبيحلل اقامة الجدار العازل  وكل حاجة عايزها السلطة تكون حلال بتبقى حلال حتى لو هى حرام .

هو انتى مصر الى خرجتى الشعراوى ومحمد عبدة والغزالى والقرضاوى ومحمد حسان ولاانتى مصر الى خرجتى سيد طنطاوى وخالد الجندى ؟
 هو انتى مصر الى وخرجت  زويل ومصطفى محمود والبرادعى   ومجدى يعقوب  وسميرة موسى  ومصطفى السيد ويحيى المشد ونجيب محفوظ وتوفيق الحكيم  ورفاعة الطهطاوى  ومجدى مهنا وابراهيم عيسى و مصطفى امين وعلى امين وام كلثوم وعبدالحليم  وشادية  صالح سليم والخطيب وحسن شحاته وابوتريكة ولا مصر الى خرجت  سعد الصغير ودينا وروبى وعادل امام وابراهيم سعيد وممتاز القط وابراهيم نافع واسامة سرايا وسمير رجب وشوبير ومرتضى منصور.
 هو انتى مصر مبارك ولا مصر السادات ولا مصر عبدالناصر ولا مصر الاشتراكية ولامصر الراسمالية ولامصر الاسلامية ولامصر القبطية ولا مصرالفرعونية ولا مصر العربية .

هو انت مصر الى نيلك جاى من الجنة ولا انتى نيلك الى مليان زبالة وجثث من كل نوع كلاب على حمير على مياه صرف على مخلفات مصانع.

هو انتى مصر الى القطن بتاعك كان احسن قطن فى العالم ولا مصر الى خلاص معتش فيها قطن بعد مستورتى البذرة من اسرائيل بذمتك مش حاجة تكسف بقى مصر الى عندها زراعة من 7الاف سنة تخيب بذرة وخبرة يعلمونا الزراعة من اسرائيل الى عمرها كله ميجيش 1على مليون من عمرك يامصر .

 هو انتى الى القطارات فيكى زى مابتطلع كدة فى الاعلانات نضيفة وواسعة وجرارات جديدة ولا مصر الى كل شوية نشوف حادثة تصام قطارات مرة قليوب ومرة العياط ومرة القطر يولع فى الصعيد انت عارفة يامصر انى بركب القطر كل يوم وحياتك عندى مفيش قطر بيطلع فى معاده والكراسى مكسرة والشبابيك مدغدغة والناس بتخشب من الساقعة فى الشتا والحمامات اقل مايتقال عنها انها متنفعش للحيوان مش للمصريين ولادك .ولما الناس زهقت ولاقت ان مفيش فايدة رفع شعار "المصرى الى على حق يقول للكمسرى لا "

هو انتى برلمانك بيدخلوه  المفروض انهم ناس محترمة بيناقشوا مشاكل الشعب  ويصدروا قوانين جديدة لصالح البلد والمواطنين ويعلموا الناس يعنى اية الراى والراى الاخر ولا  مصر الى نوابها  شوية اميين على شوية هتيفة بتوع نعم موافقة على شوية متهربين من التجنيد على شوية رجال اعمال حرمية على شوية  بيناموا فى الجلسات على شوية بيضربوا بعض بالجزم ويسبوا الدين لبعض  


هو انتى عاصمتك القاهرة الجميلة الساحرة الى بتبهر الى يزورها لاول مرة والى مليانه عبق تاريخ وحضارة عظيمة ولا عاصمتك الزحمة الخنقة  المليان عشوائيات وبلطجة واغتصاب

هو انتى رجالتك المعروف عنهم الشهامة والجدعنة والدم الحر والى كانوا بيقفوا وقفه رجاله علشان ارضهم وعرضهم  ولاانتى رجلتك الى بقى دمهم بارد ومعتش عندهم نخوة ولاشهامة ولا رجولة و كل وقفتهم دلوقتى علشان الفياجرا واخواتها .
هو انتى حريمك الام العظيمة الصبورة الى بتربى رجالة بجد وتفضل طول عمرها شغالة فى سايقة على شان ولادها وجوزها ولا الست الى بتجيب فلبنية تربى ولاده وكل هما مكياجها وشلتها فى النادى


هو انتى بناتك المعروف عنهم الادب والاخلاق والاحترام والحياء  الى الواحدة منهم بتشيل مسئولية بيت من سن 18  ولا انتى بناتك الى الى معدش عندهم زرة حياء وبيمشوا يتمرقعوا فى الشوارع و بيلبسوا لبس ضيق هيفرقع عليهم ويحطوا مكياج فاضح وبيجوزوا عرفى .
هو انتى شبابك الشباب المحترم المتدين الى عندة احلام وطموحات وعايز  يغير  مستقبلك للافضل ولاانتى شبابك النيتى الى مسقطين البناطيل ومجلجلين شعرهم وكل همهم ازاى يعملوا دماغ ويظبطوا المزة

هو انتى الى شوارعك امان وبنمشى فيه من غير خوف حتى لو فى نص الليل ولاانتى مصر الى شوارعك مليان تحرش وسرقة وخطف واغتصاب وقتل .


 هو انتى مصر الى تعليمك بيفرز خرجين بجد على مستوى عالى من العلم ولاانتى مصر الى الخريج فيكى بيطلع بعد 16 سنة تعليم ابيض فلة دماغة انضف من الصينى بعد غسيله

اقولك حاجة اخيرة مهما كانت اجابتك يامصر هفضل احبك لاخر نفسى وهيفضل حبك يجرى فى دمى لاخر نقطى لانك امى يامصر